Ársfrágreiðing 2024

Parkinsonfelagið var stovnað 1990.

Høvuðsendamálið hjá felagnum er at upplýsa um sjúkuna, og at geva sjúklingum og teirra avvarandi høvi at koma saman til samskifti og hugna.

At betra um korini hjá fólki við Parkinsonsjúku.

At veita stuðul til gransking.

At lutaka í norðurlendskum og europeiskum samstarvi.

Parkinsonfelagið er limur í Megd. Limirnir fá danska Parkinson Nyt 4 ferðir um árið.

Aðalfundur hjá Nordisk Parkinson Råd

Meginparturin av 2024 gekk við fyrireikingum til NPR-aðalfundin, sum var 3, 4 og 5. sept 2024. Vit vóru sum fyrr fortalt vertir: Parkinsonfelagið í Føroyum. Hesir fundir eru einaferð um árið og londini skiftast um at skipa fyri. Vit eru sum heild sera væl nøgdar.

Vit høvdu leigað okkum inn á Hotel Djurhuus, sum egnaði seg sera væl til hetta høvi. Vit vóru uml 20 fólk og vóru tey øll sera væl nøgd við tað, vit høvdu fyriskipað. Fingu stórt rós !!

Lutakararnir vóru úr Íslandi. Noregi, Svøríki, Finnlandi, Danmark og Føroyum.

Vit høvdu 3 innsløg úr Føroyum. 2 granskarar úr Føroyum, Maria S.Petersen og Jana Mortensen, sum hava fingið peningaliðan stuðul frá Jarðarferðargrunninum hjá Parkinsonfelagnum og so eitt Netinnslag frá Lailu Midjord, við sínum sera  áhugaverda projektið Drinksaver glasinum, sum fleiri av teimum vístu áhuga fyri.

Til eitt slíkt tiltak er ein føst dagsordan, sum man skal fylgja, har øll londini koma við sínum innleggum.

Hetta er áhugavert og gevandi, hóast vit á ongan hátt kunnu samanbera okkum við tey,  Men vit smæddust ikki burtur, og hildu tey, at hóast okkara lítlu populatión, var tað flott at hava fleiri projekt at vísa á. Fingu eisini rós fyri at vit høvdu skaffað peningaligan stuðul, so tað ber til at hava eitt slíkt tiltak í Føroyum. Útyvir teir vanligu stuðlarnar til júst hesi tiltøk, vóru m.a. Tórshavnar Kommuna, Megd og Varðin.  

Afturat tí fagliga, so góvu vit teimum eisini nakrar góðar upplivingar. Havnin vísti seg frá síni bestu síðu við góðum veðrið.  Høvdu bílagt ein siglitúr við Norðlýsinum.

Alt eftir hvussu veðrið bleiv, so skuldu vit sigla við seglum, fyri at vísa teimum hetta stásiliga skipið. Tey fingu øll útleverað eina húgvu við Norðlýsinum á og sum eisini hevur endurskyn. Vit sigldu eystur um Nólsoydna og framvið eystursíðuni og innum Kapilin. Av tí tað var so stilt í veðrinum, fingu tey eitt gott upplivilsi og tóku nógvar náttúrumyndir. Fingu eisini góða frágreiðing frá skiparanum um søguna hjá Norðlýsinum.

Vit fingu eisini víst teimum 2 av okkara sera hugnaligu matstovum í Havn, Katrinu Christiansen tað eina kvøldið, har vit fingu eitt listarligt innslag við sangbókinum Silvitni. Seinna kvøldið ótu vit á Skeiva Pakkhúsi. Sera góð upplivilsi bæði kvøldini.

Eisini brúktu vit okkara egnu ambassadørar við vørum í einum gávupakka, vit høvdu sett á borði, áðrenn byrjan av fundinum. Har var hondgjørt borðpríði úr træi, sum ímyndar eina ær og eitt lamb, frá Sisabrand. Sjokolátu frá Gómagott, heimagjørda sápu úr m.a. føroyskari tolg, frá Elin´sa.  Eisini hevði Laila Midjord frá Drinksaver forert okkum gløs, sum vit kundu geva sum gávu.

Afturat hesum, høvdu vit fingið Føroya Prent at gjørt okkum mappir til allar luttakararnar við okkara Parkinson logo á.

Næsta NPR aðalfundur verður í Danmark í heyst.

Støðan í heilsuverkinum

Aftur í fjør var nakað av ótryggleika rundan um Neurolog á LS. Eg havi verið í samskifti við leiðsluna á Med.deplinum, og siga tey at avtalan við Jacob Geday bert var árið út. Síðani hava tey gjørt avtalu við Neurolgin Ole Nielsen, sum er settur alt árið 2025, 2 arb.vikur hvønn mánaða. Restina av tíðini hava tey tætt samskiftið við Neurologin Bjarka. Eisini kann man ringja dagliga fyrrapartar og tosa við sjúkrarøktarfr. ella skrivara, sum kunnu bera boðini víðari.

Skilji sera væl, at nøkur av tykkum eru ørkimlaði, sum innan stutta tíð hava møtt 3 ymiskum Neurologum. Óyva hava teir, eins og flest allir serlæknar, ymiskan holning til tingini. Hoyri frá onkrum, at tey skulu skera niður upp á onkran heiligvág og aftur onnur eru biðin um heilt at gevast !! Vil bara minna á, at um tit eru alt ov ørkimlaði, so skulu tit ikki halda tykkum aftur, at kontakta LS.

Í samskifti við Medesinska Depilin, hava vit eisini havt upp at venda møguleikan at Neurologarnir áttu at undirvíst heilsustarvsfólki í at verða betur før fyri at hjálpa fólki við Parkinson. Hetta kemur vónandi ígjøgnum, innan ov langa tíð.

Vit hava eisini verið við í samskiftinum við Heilsumálaráði, sum skal gera ein nýggjan Heilsupolitik við yvirskriftini : Skipa Heilsutænastur í nærumhvørvinum hjá borgaranum. Hetta taka vit so dyggiliga undir við, men hetta krevur nógv av verðandi heilsustarvfólki. Ynskið frá okkum var tí, at skúla heilsustarvsfólki runt í landinum, til at verða nógv betur før fyri at hjálpa m.a. Parkinsonraktum. Hetta geldur bæði Komm.læknar, sjúkrarøktarfrøðingar, heilsurøktarar og onnur ið starvast innan Heilsuverkið. Eisini starvfólk á Røktarheimum, Ellisheimum og í Heimarøktini.

Parkinson felagið bleiv í summar kontaktað av Miu Pedersen, sum er Dygdarmennari í samtakinum Vesturvón, sum er ein heildartænasta, sum heldur til á Sýnini í Miðvági. Hetta umfatar bæði heimatænastur og tænastur á Sýnini. Hon eftirlýsti meirkunning í røkt av fólki við Parkinson og hevði hon ynskt, at starvfólkið fekk meira undirvísing í júst tí. Tey eru í ferð við at gera nakað  við hetta og spurdu um vit vildu verða við. Evt. fáa okkurt umboð frá okkara limum og avvarðani at fortelja sína søgu og annars koma við ynskjum um batar. Vit komu ikki so langt við tí í fjør, m.a. tíðarneyð og so kom eisini streyka, sum forpurraði tað heila. Men vit vilja gjarna verða við, um orka verður til tað eina aðru ferð.

Tórshavn Marathon

Bragdið, sum skipar fyri Tórshavn Marathon, hevur aftur bjóðað okkum at verða ein partur av tiltakinum. Tey velja at stuðla Parkinson felagnum, Heilafelagnum og Sinnisbata við pengum, sum koma inn frá ½ gongumarathon. Her fara 100 kr frá tilmeldingarupphæddini hjá hvørjum til hesi 3 feløgini.

Eisini symbolst, tí vit vita hvussu góð rørsla er fyri okkum øll. Vit bíløddu okkum húgvir  og vestar við endurskini á og sjálvandi Parkinson loga, frá Vest pack í Vestmanna. Hetta gjørdi okkum sjónlig og halda vit hetta er eitt gott tiltak. Vit mangla vaktir, so meldi tykkum gjarna til. Sum er, hava bert vit í nevndini og okkara nærmastu verið við.

Tað sum tað gongur út upp á, er at standa vakt ymsa staðni kring í býnum í 2-3 tímar.

Hendan avtalan er eisini í ár og verður Tórshavn Marathon sunnudagin 1.juni 2025

Man kann fylgja við á Heimasíðuni og Facebook síðuni hjá felagnum, nær man kann melda seg til, sum luttakari  ella vakt.

Limatiltak í novembur

Okkara seinasta limatiltak í fjør var í novembur mánaði. Stak hugnaligt, møtt vóru uml 30 fólk, hóast sera vánaligt veður.Høvdu m.a. lagt upp til at fólk komu við teirra ynskjum og hvat tey annars høvdu upp á hjarta. Fingu tosað nøkur ting ígjøgnum. Tey ynsktu at fáa boð og tíðindi á Telduposti heldur enn bara á Heimasíðuni. Hetta royna vit at gera nakað við, men hetta krevur eisini at Teldupostadressan er røtt og at vit fáa at vita um broytingar eru í adressuni. Eisini kom upp at venda, at limirnir sjálvir kunnu upprætta bólkar, so tað ber til at samskifta sínámillum. Eisini kunnu tey avvarðandi gera ein bólk. Alt hetta krevur bert ,at onkur meldar seg til at standa fyri tí.

Vit høvdu fingið Benjamin Petersen at spæla gittar til felagssang. Hetta var stak hugnaligt og fólk sungu væl við. Drekkamuður og okkurt søtt afturvið.

Venjing

Tey frá Suðuroyar Sjúkrahúsi siga , at enn eru ov fá sum melda seg til Parkinson Rehabiliteringina. Tey høvdu ynskt fleiri og siga tey at tey eisini arbeiða við onkrum tilboði til tey, sum evt. eru ov illa fyri ella verða vald frá til sjálva  útgreiningina. Vit hoyra frá teimum, so skjótt hetta verður verðuleiki.

Tilboð um viðlíkahaldsvenjing hjá Almennaverkinum víðkað.

Tilboðið viðlíkahaldsvenjing er nú víðkað til at fevna um allar heimabúgvandi borgarar, í aldrinum18 ár til pensiónsaldur, við skerdum førleikum, ella sjúku,ið hava ávirkan á gerandisdagin. Sí skriv um hetta á heimasíðuni hjá Parkinsonfelagnum og hjá Almannaverkinum.

Tórshavnar Kommuna bjóðar eisini venjing til fólk við Parkinson.

Tað er Terapideildin hjá Heilsu og umsorganartænastuni, sum stendur fyri tí. Ein longri frágreiðing er at finna á Heimasíðuni hjá Parkinsonfelagnum. Man kann eisini ringja til tey á tlf.nr 302000 ella skriva ein teldupost : heilsuhusid@torshavn.fo

Nevndarval

Joy Simonsen og Elisabeth Simonsen standa fyri vali.

Elisabeth ynskir at halda á 2 ár afturat, men Joy ynskir at fara í pausu , so vit hava spurgt Niels Dann West um hann kann traðka til sum kassameistari fyri Joy. Tað vil hann, so um ongin annar meldar seg til, so ynskja vit honum  vælkomnan í nevndina.

Sostatt er nevndin henda:

Forkvinna Anna Beder

Næstforkvinna Harriet Gordonsdóttir

Skrivari Elisabeth Simonsen

Kassameistari Niels Dann West

Nevndarlimur Helma Maria Tróndheim

 

Eyka limir Anna-Kristin Bæk

Sunneva Bæk